專一測試器（上）
「講起以往嘅感情經歷，幾乎人人都會話，自己遇過人渣、俾人背叛過。
但冇人會話，自己做過人渣，咁人渣到底喺邊度嚟？」
「答案好明顯：每個人渣，都會掩飾自己嘅過去。
所以你身邊嘅另一半，到底係唔係人渣？
只須五千蚊，購買『專一測試器』，測試另一半對你嘅專一程度！」
見到呢個廣告，我真係好心動。
我男友阿輝生得靚仔，又事業有成，實大把女仔鍾意。
阿輝到底專唔專一呢？佢係唔係一個值得託付終身嘅對象？
為咗得到答案，我馬上去嗰間舖頭，買咗一個「專一測試器」。
測試器嘅用法好簡單，只要將手指撳喺屏幕上，就會顯示出雙方對對方嘅專一程度。
呢部機係咩原理？我都唔清楚，不過佢啱啱推出市面，又話有乜乜乜認證咁，咪買嚟試吓囉。
阿輝對呢樣嘢好反感，佢話佢自然會專一，駛乜試嚟試去。
我求咗佢好耐，佢先隨隨便便擺隻手指落去。
結果顯示，我對佢嘅專一程度係「90%」，而佢對我嘅專一程度係「10%」。
我嬲到成個彈起：「我對你咁好，你居然瞞住我有第個？」
「我邊有啊？你屈我？」阿輝瞪大雙眼：「你寧願信一部機器，都唔肯信你嘅男朋友？」
「但佢話你得10%......」望住阿輝委屈而陰暗嘅表情，我只好搵出「專一測試器」嘅說明書。
說明書上話：「專一指數只代表對象專一的可能性，並不代表過往記錄，即使是專一程度為0%的人，也可能尚未出軌。」
阿輝即刻話：「你睇到未啊，佢話唔代表過往記錄，即係我冇出軌啊。」
我忍唔住講：「即係你以後會出軌囉。」
呢場對話當然不歡而散，阿輝覺得佢冇出軌，我都冇證據證明佢出咗軌。
但自此之後，我心底好警惕，我總係覺得，阿輝就算未出軌，將來都一定會出軌。
佢專一嘅機率得10%，換句話講，點會專一？
我化身福爾摩斯，開始用各種方法監控阿輝。
首先，我同佢嘅朋友打好關係，日後就可以獲取更多情報。
從佢嘅朋友口中得知，阿輝以前真係一個Player。
以前佢事業上雖然冇咁有成就，但由於生得靚仔，一直都有好多女朋友。
我當然問：「咁近排呢？」
「唏，阿嫂，同咗你一齊之後，阿輝咪專一囉，依加係好男人嚟！」阿輝嘅朋友咁講。
我都估到，阿輝嘅朋友一定會幫住佢，講吓過去冇所謂，但即使依加阿輝一腳踏兩船，朋友都唔會話畀我知。
但憑藉阿輝嘅過往記錄，我明白點解「專一測試器」會話佢得10%專一機率。
要知道真相，只可以靠自己。
我喺阿輝嘅手機上，偷偷安裝咗監控軟件。
阿輝嘅每一個定位、訊息、通話，我都睇得一清二楚。
從此，我每日放工返屋企，第一件事就係睇果個監控軟件。
出乎意料地，我等咗半年，都冇等到任何出軌嘅痕跡。
阿輝每日除咗返工同OT，就係返屋企瞓覺同陪我，偶爾同朋友出去飲嘢，佢嘅訊息同定位都證實佢冇講大話。
我唔明白！
會唔會係，阿輝有另一部電話出軌專用？
下集：http://bit.ly/3pLuohn
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #專一測試器
Search